Përditësuar

Si të krijoni një aplikacion celular për biznesin tuaj

Shkurt

Filloni me një problem të vetëm që aplikacioni duhet ta zgjidhë dhe me versionin më të vogël që e zgjidh atë. Pastaj zgjidhni formën: aplikacion web që hapet nga një link, më i shpejti për t'u nisur, ose aplikacion në App Store dhe Google Play, kur ju duhen vendndodhja në sfond, njoftime të besueshme në çdo telefon, prania në dyqane ose përdorim i përditshëm. Rruga është gjithmonë e njëjta: plan, skica që i provoni në telefon, ndërtim me etapa të shkurtra, testim me njerëz të vërtetë dhe publikim.

1. Përcaktoni problemin, jo listën e funksioneve

Aplikacionet që dështojnë zakonisht kanë filluar me një listë të gjatë dëshirash. Shkruani në një fjali kush e përdor aplikacionin dhe çfarë bën me të, për shembull "klientët rezervojnë një orar pa telefonuar" ose "shoferët shënojnë dorëzimet nga telefoni".

Nga kjo fjali del versioni i parë: vetëm ekranet që duhen për atë veprim. Gjithçka tjetër shkon në listën për më vonë, kur të shihni si e përdorin njerëzit.

2. Web, App Store apo të dyja?

  • Aplikacion web (PWA): hapet nga një link ose kod QR, shtohet në ekranin e telefonit dhe nuk kalon nga miratimi i dyqaneve. Zgjedhja më e shpejtë për rezervime, porosi, menu dhe portale klientësh.
  • Aplikacion në App Store dhe Google Play: ia vlen kur ju duhen vendndodhja në sfond, njoftime të besueshme në çdo telefon, funksione të thella të telefonit ose kur njerëzit e hapin çdo ditë.
  • Një kod për iOS dhe Android: me React Native ose Flutter ndërtohet një aplikacion i vetëm për të dy telefonat, në vend të dy aplikacioneve të veçanta.
  • Shpesh fillohet me versionin web dhe, kur rritet numri i përdoruesve, i njëjti produkt publikohet edhe në dyqane.

3. Skica që i provoni në telefon

Para se të shkruhet kodi, ekranet vizatohen dhe lidhen në një prototip që e hapni në telefonin tuaj. Kjo është faza ku ndryshimet kushtojnë më pak: lëvizni butona, hiqni hapa, provojeni me dy ose tre klientë. Një orë testim këtu kursen javë pune më vonë.

4. Ndërtimi me etapa të shkurtra

Aplikacioni ndërtohet me etapa një- ose dyjavore, dhe në fund të secilës shihni diçka që funksionon. Bashkë me ekranet ndërtohet edhe pjesa që nuk duket: llogaritë e përdoruesve, baza e të dhënave, paneli ku ju menaxhoni rezervimet, porositë ose përmbajtjen, dhe njoftimet.

5. Publikimi në App Store dhe Google Play

  • Apple kërkon një llogari Apple Developer me pagesë vjetore, dhe çdo version kalon nga shqyrtimi i Apple para se të dalë.
  • Google Play kërkon një llogari zhvilluesi me një pagesë të njëhershme. Llogaritë personale të reja duhet ta testojnë aplikacionin me të paktën 12 testues për 14 ditë para publikimit. Llogaritë e biznesit nuk e kanë këtë kusht, por kërkojnë numrin D-U-N-S të kompanisë.
  • Të dy dyqanet kërkojnë politikë privatësie, foto të ekraneve, përshkrim dhe, nëse aplikacioni ka hyrje me llogari, një llogari demo për shqyrtuesit.
  • Llogaritë është mirë të hapen në emrin e biznesit tuaj, që aplikacioni të mbetet i juaji.

Sa kohë duhet

Varet nga numri i ekraneve dhe nga ajo që duhet lidhur: pagesat, hartat, programet që përdorni tashmë. Një aplikacion web me pak ekrane është punë javësh. Një aplikacion me llogari, pagesa, panel menaxhimi dhe publikim në të dy dyqanet është punë muajsh. Afatin e saktë e jep vetëm plani javë pas jave, pasi të jetë përcaktuar versioni i parë.

Çfarë duhet të keni gati

  • Fjalia me problemin dhe kush e përdor aplikacionin.
  • Logoja, ngjyrat dhe tekstet kryesore, ose kush do t'i përgatisë.
  • Mënyra e pagesës: pagesa me kartë kërkon një shërbim pagesash online nga banka juaj ose nga një ofrues tjetër.
  • Kush e menaxhon aplikacionin pas publikimit dhe si do t'u përgjigjeni përdoruesve.

Si punojmë ne

Te Novaris Labs fillojmë me një takim pune për versionin e parë, pastaj merrni çmim fiks dhe plan me shkrim. Ju tregojmë progresin çdo javë, kujdesemi për publikimin dhe procesin e shqyrtimit në dyqane, dhe kodi dhe llogaritë janë të tuajat. Kupon, aplikacioni ynë web që lexon kuponat fiskalë nga Tatimet, funksionon live dhe hapet nga çdo telefon.

Filloni një projekt

Tri pyetje të shkurtra: çfarë ju nevojitet, në ç'fazë është projekti dhe si t'ju kontaktojmë. Ju merr rreth një minutë. Përgjigjemi brenda dy ditëve pune.

Udhëzues të tjerë